Manipur-ah ruihhlo Rs vbc 38 hu man

Tengnoupal district, Manipur-a Bongyang khuaah Narcotics and Affairs Border (NAB) 18 Assam Rifles combined team chuan Thawhlehni khan ruihhlo, cheng vaibelchhe 38 hu an man. 

Ruihhlo hi store room an dapnaah an man a, an ruihhlo man hi WY (World's Yours) tablet nuai riat (kg 80) leh heroin powder kg thum a ni. WY tablet an man hi international market-ah cheng vaibelchhe 32 man niin, heroin hi cheng vaibelchhe ruk man a ni. 

NAB office, Imphal-a press conference an neihah, SP W Basu chuan ruihhlo kaihhnawihah hian Tengoupal khua ami, Khaikholun Mate (34) man tel a ni tih a sawi. An mi man hi Moreh aṭanga ruihhlo an phurhna motor khalhtu a ni a, ND and PS Act section 21(c)/60 (3) hnuaiah thubuai siamsak nghal a ni tih a sawi bawk. 

SP chuan ruihhlo an man hi Myanmar aṭanga tawlhluh a nih thu leh, Manipur kaltlang hian India ram khawpui lianahte thawn tum a ni tih a sawi.