SC thupek palzut vangin ONGC-in Rs vbc 2.05 chawi

Assam Pollution Control Board chuan PSU firm Oil and Natural Gas Corporation (ONGC) lakah Supreme Court thupek an palzut avangin cheng vaibelchhe 2.05 an chawitir.

ONGC hi Assam chhunga state energy khur lian paruka environmental law palzuta puh an ni a, thla khat chhungin an pawisa chawi tur hi pe hman tura hriattir an ni bawk. Hremna lekkawh a nih hma hian Pollution Control Board, Assam (PCBA) chuan company hnenah hian June 28 khan show cause notice tichhuakin ONGC lam pawh hian July 18 khan an chhang tawh a ni. Mahse an chhanletna kumin July 6-8 chhunga Board hnuaia Head Office cum Central Laboratory engineer leh scientist-ten an thil hmuhchhuah leh hriatchhuah behchhana siam a ni lo tih sawiin an pawm lo.

PCBA chuan Regional Laboratory cum Office board-ten an enfiahnaah khurah hian put (leak) a awm tih an hmuchhuak tih an sawi. Supreme Court-in February 22, 2017-a thupek a tihchhuahah  discharging unit zawng zawngte chu Primary Effluent Treatment Plant (PETP) thla thum chhunga dah vek turin a hriattir tih sawiin, May 22, 2017 thleng hun pek an ni a, mahse hei hi ONGC hian an zawm loh avangin SC thupek chu an palzut a ni, an ti.