TTAADC inthlanah IPFT leh BJP thawkdun dawn lo

Tripura-a rorellai party pahnih, Bharatiya Janata Party (BJP ) leh Indigenous People's Front of Tripura (IPFT) inkar khi a zau zel a, Tripura Tribal Areas Autonomous District Council (TTAADC) inthlanah pawh party malin chuh an tum.  

TTAADC hian Tripura ram zau zawng hmun thuma ṭhena hmun hnih chuang zet a huam a, mi nuai 12.16 an cheng a ni. TTAADC-ah hian member 30 awmin, member pahnih state sorkarin a ruat an ni a, a bak member 28 chu mipuiten an thlang ṭhin a ni. Tunah hian TTAADC-ah hian eptu pawl,  Communist Party of India-Marxist (CPI-M)-in thuneihna an chang mek a, nakkum April-May thlaah an inthlang ang. 

IPFT General Secretary leh Tribal Welfare and Forest Minister Mevar Kumar Jama­tia chuan BJP central leh state hruaitute hnenah pawh, TTAADC inthlanah party mala chuh an tum tih an hrilh tawh niin a sawi. Party President leh Revenue Minister Narendra Chandra Debbarma hoin party aiawhte chuan kar hmasa khan BJP working president J.P.Nadda chu New Delhi ah an lo hmu tawh a ni. 

Tripura-a BJP kaihhruai sorkarah hian IPFT hian MLA pariat neiin, minister pahnih a nei mek a ni. IPFT hi Northeast Democratic Alliance (NEDA) member a ni bawk.