Assam-ah doctor kut thlak, hospital suasam

Assam-a Jorhat district-a tea estate worker-ten damdawi-ina damlo enkawl lai a thih avanga doctor an sawisak rawn hnu lawk, Nilaini zan khan Goalpara district-a mipui thinrimin doctor an sawisa leh a, damdawi-in pawh an suasam zui bawk. 

Damdawi-ina thawkte sawi danin, Nilaini zan khan motor accident-a hliam tuar nia sawi mi pathum chu damdawi-inah hian hruai an ni a, doctor duty chuan an mi hruai zinga pakhat chu damdawi-ina thlenpui a nih hmain a thi tih a lo puang tih an sawi. Hei hi damlo hruaitute chuan pawm loin, doctor Apurba Boro chu kut an thlak bakah, damdawi-in pawh an suasam zui ta a ni. Buaina chhuah hnuah hian police-te kal nghalin, doctor leh staff dangte chu mipuiin an khawih zui leh hmain an chhanchhuak hman a ni. 

Assam Medical Service Association (AMSA) chuan Goalpara district damdawi-ina thil thleng chu an dem thu sawiin, Dudhnooi police station-ah FIR an thehluh nghal bawk. AMSA president Paresh Kalita chuan doctor-te kutthlakna a thleng fo chu an dem thu sawiin, he thil hi enfiah a ngai takzet tih a sawi.