Damdawi leh industry lam thil bikah Cannabis hman phal dan ngaihtuah dawn: Manipur CM

Manipur chief minister Nongthombam Biren Singh chuan a kaihhruai sorkar chuan damdawi leh industry lam thilah bik cannabis (ganja) hman phal dan a ngaihtuah dawn tih a sawi. 

Kar kal ta Inrinni-a press con­­ference a neihah, Manipur CM chuan hemi chungchang hi buaipui mek a nih thu leh, cabinet meeting hmasa berah ngaihtuah a nih tur thu a sawi. Chief minister Biren Singh chuan ganja chin dan pawh awmze nei taka kalpui a, damdawi thil bik atan hman theih tura dan khauh tak siam a ngaih thu a sawi bawk. 

Ramchhung state dang pathum, Arunachal Pradesh, Uttrakhand leh Uttar Pradesh pawhin damdawi atan bik ganja hman phalna dan hi an lo siam thu a sawi a ni. State sorkarin ruahmanna a siam chu a hlawhtlinna theihna turin mipuite, mithiamte leh civil society organisation hrang hrang bakah media-te thawh­puina an mamawh thu CM chuan a sawi  bawk. 

Biren Singh chuan kum 2016-2017 chhunga state-in chhiah aṭanga a sum lakluh cheng vaibelchhe 587 chu kum 2018-19-ah Rs vbc 1,000 chuangah a pung tih a sawi. Hei bakah hian Manipur Gross State Domestic Product pawh 2016-17-a 4% chu 2018-19-ah a let, 8%-ah a pung tih a sawi bawk a ni. 

Manipur tlawhtu, ramdang mi khualzin pawh an pung zel tih sawiin, CM chuan kum 2015-16-ah kum khatah ramdang mi tlawhtu an neih chu 500-600 vel an nih laiin, tunhnaiah chuan thla khatah khualzin 1,000 chuangte an awm a ni, a ti.