Guwahati-Bangkok direct flight vai liam

Lokapriya Gopinath Bordoloi International (LGBI) Airport, Guwahati-ah Pathianni zan khan Assam chief minister Sarbananda Sonowal chuan Guwahati-Bangkok direct flight hmasa ber a vai liam. 

Assam sorkarin ASEAN bial nena inkalpawhna kalka pawimawha Guwahati siam a tumna peng pakhatah, Guwahati leh Bangkok inkarah direct flight thlawh tir a ni dawn. Nok Air chuan thlawhtheihna service tirin, Guwahati aṭanga Bangkok khawpui bul, Don Mueang inkarah thlawkin, darkar thum aia reilo an thlawk ang. 

Chief Minister Sonowal chuan thlawhtheihna service chu airline route lam zauh belhna chauh ni loin, Assam leh Thailand inkara inlaichinna ṭha leh nghet zawk siamna tur a ni tih a sawi. Sorkar laipui chuan UDAN scheme hnuaiah Guhawati aṭanga South East Asia ram pathumte kalpawhna tur siamin hma a la mek a ni. Kumin July 1 khan Guwahati-Dhaka flight chu International Air Connectivity Scheme hnuaiah Spicejet-in a lo thlawh tir tawh bawk. Guwahati aṭanga Kathmandu, Yangon, Hanoi leh Kuala Lumpur flight pawh tihfel thuai tum a nih thu state sorkar chuan a sawi. 

LGBI airport hi kum 1953-a siam niin, ṭum eng emaw zat chei ṭhat leh tihlen a ni tawh. Kum 2017 khan he airport-ah hian mikhual lut leh chhuak maktaduai 3.7 zet a dawng a, kum 2016 aia an punna hi 36% zet a tling. Kum 2018-2019 chhungin khualzin hi maktaduai 5.7 zetah an pung tawh bawk. Terminal building hian arrival/departure passenger 850 chin dawng zo tura tih a ni a, terminal building thar siam hna pawh thawh mek a ni bawk.