Meghalaya-in dan khauh zawk siam tum

Meghalaya sorkar chuan an ṭhenawm, Assam-in National Register of Citizens (NRC) final list a tihchhuaha tel lo mi tam takte an state-a lut tur venna atan, Meghalaya Residents Safety and Security (MRSS) Act 2016 siamṭhat a tum. 

Deputy chief minister Prestone Tynsong chuan hemi chungchang hi Pa­thianni khan sawiin, dan loa an state-a luh tumte venna tur khauh zawka siam tum a ni tih a sawi. State sorkar chuan  Megha­laya Residents Safety and Security (MRSS) Act 2016 siamṭhat rawtna chungchang hi state chhung political party hrang hrang aiawhte a sawipui dawn a, an remtih tlan hunah state cabinet pawmpuina lak a ni ang a, hemi hnu hian pass a ni ang, a ti. 

Inner Line Permit (ILP) system hman thlawptute chuan state sorkar hnenah hian MRSSA siamṭhat turah hian ILP provision-te pawh telh turin an lo ngen tawh a ni. Khasi Students Union leh pawl dang hrang hrang pawhin ILP system ang chi hmang tur hian sorkar an lo ngen tawh bawk.