Feb 7-ah PM-in Assam road project hawng dawn

Prime minister Narendra Modi chuan February 7-ah Assam state tlawhin, Sonitpur district-a Dhekiajuli-a cheng vaibelchhe 5,000 man Assam Mala project a hawng dawn. 

Assam PWD minister Himanta Biswa Sarma chuan Assam Mala project hnuaiah hian road corridor 42 siam a ni dawn tih a sawi a, hemi atan hian tender 12 tihchhuah a ni tawh tih a sawi bawk. 

PM hian assembly inthlan hmachhawn mai tur, Assam state hi kumina a tlawh ṭum hnihna tur a ni ang. January 23 khan Upper Assam a lo tlawh tawh bawk a, Sivasagar-a hun a hmanah ram leilung fa, chhungkaw tam tak hnenah land patta a sem a ni. 

Sarma chuan Assam Mala project hnuaiah hian state highway, district road leh kawngpui pawimawh dangte chu National Highway specification angin thuam ṭhat an ni dawn tih a sawi. He project enpui tur engineer-te pawh meeting a neihpui tawh bawk. 

Assam sorkar chuan he project kaltlang hian state highway zawng zawngte chei ṭhat vek a tum tih a lo sawi tawh bawk a, kum 15 chhungin thawh zawh tum a ni. A thawh khatnaah hian highway km 2,500-a thui chu chei ṭhat a ni ang.