Meghalaya sorkarin zirna inte thuam ṭha dawn

Meghalaya chief minister Conrad K Sangma chuan a kaihhruai sorkar chaun state chhunga zirna in hrang hrang, elementary level aṭangin thuam ṭhat leh tihchangtlun a tum tih a sawi. 

Thawhṭanni khan CM hian South West Garo Hills district-a Garobadha Secondary School leh Rangsakona Higher Secondary School building thar a hawng a, thu a sawiah state chhunga LP school 200 chu kumin chhunga thuam ṭhat tum a nih thu a sawi. LP school pakhat thuam ṭhatna atan hian cheng nuai 40 zel ruahman a ni a, kum thum chhungin school 800 vel an thuam ṭha hman dawn tih a sawi a ni. 

South West Garo Hills-a school building hawn thar pahnih sakna senso hi Asian Development Bank-in 'Supporting Human Capital Development in Meghalaya' hnuaia a tumsak a ni. Rangsakona School sakna atan cheng vaibelchhe 1.86 leh Garobadha School sakna atan cheng vaibelchhe 3.09 an seng a ni. 

CM chuan state chhunga education infrastructure-te an ṭha lo hle tih sawiin, Education minister leh a enkawl department-in zirna in hrang hrangte thuam ṭhatna tur project an kalpui chu fakawm a tih thu a sawi. State chhungah government LP school 2,000 chuang a awm thu leh,  sum lam harsatna avangin heng school-te hi kum eng emaw zah cheiṭhat an ni tawh lo tih a sawi. Mahse a kaihhruai sorkar chuan zirlai naupangte tana zirna in leh a chhehvel boruak ṭha siam tuma hma lain, thuam ṭhat tumin hma a lak thu a sawi . 

Nu leh pate chu an fate, zirlaite ngaihsak tura ngenin Sangma chuan, "Naupangte hian an hun tam zawk hi nu leh pate bulah an hmang a, hei vang hian nu leh pate hian an ngaihven ṭhat a ngai a ni. An awmdan te thlithlaiin, homework an ti em tih leh, school an kal ṭha em tihte pawh an enzui reng a ṭul. Zirna ṭha siam tur chuan kan thawhho a ngai. Zirtirtu, nu leh pa, leh naupangte pawimawh dan a inang vek a ni," a ti.