Manipur Congress-in fuel man tihsan duh lohna lantir

Manipur-a eptu pawl, Congress party chuan Imphal oil depot-a fuel man tihsan duh lohna lantirin Thawhṭanni khan nawrh an huaihawt. 

National Students' Union of India (NSUI) unit, Manipur Pradesh Youth Congress Committee (MPYCC) leh Seva Dal member-ten nawrh hi huaihawtin, BJP sorkar duh lohna thuziak hrang hrangte an tarlang bawk. 

MYPCC general secretary Sharungbam Johni Meitei chuan central-a BJP sorkar chuan diesel, petrol leh cooking gas man tisangin, miretheite a rawk a ni, a ti.  Crude oil man a hniam ber laiin, petrol, diesel leh cooking gas man chu a san ber lai a ni thung niin a sawi. Sorkar chu fuel man a tihsanna hi sut leh tura phutin, hun rei tak Covid-19 hripui leng vanga lockdown puanin mi tam tak harsatna a thlen tawh hnuah, phurrit a siam belh sak a ni, a ti. Hei vang hian fuel man tihsanna chu sut leh nghal turin an phut tih a sawi.