AP Frontier Highway siam hna thawk ṭan thuai dawn

Arunachal Pradesh deputy chief minister Chowna Mein chuan Indo-China ramri hrula km 2,000-a thui, Arunachal Frontier Highway siam hna chu thawh ṭan a ni thuai dawn tih a sawi. 

Chowna Mein chuan kawng siam tur endik hna hi zawhfel tawh a ni a, hna ṭhawh ṭan  a ni thuai dawn tih sawiin, Frontier Highway siam tur hian Changlang district-a Vijaynagar khua aṭangin Tawang district-a Mago-Thingbu a pawh dawn a ni, a ti. 

Papum Pare district-a Pare lui-a steel hmanga lei dawh a hawnnaah deputy CM chuan he thu hi a sawia, East-West Industrial Corridor pawh siam thuai a nih tur thu a sawi tel bawk. Meter 75-a thui, steel lei chu Sagalee sub-division hnuaia Pech-Hoj, Upper Balapu leh Balapu mipuite tan a hlan tih sawiin, deputy chief minister chuan he lei dawh thar hi state sorkarin kumthar thilpek atana a pek a ni, a ti. 

Mein chuan an state-in chak zawka hma an sawn theihna turin mipuite pawhin an rilru puthmang an thlak a ngai tih a sawi. Inkalpawhna ṭha chu state sorkarin a ngaihpawimawh ber zingah mi a nih thu a sawi bawk.