Garo-ten state hran phutin rally huaihawt dawn

Garoland State Movement Committee (GSMC) chuan Garo­land state hran siam tura an phutna nawrna turin November thla hian New Delhi-ah rally lian tham tak huaihawt an tum tih an sawi. 

GSMC chairman Nikman Mark chuan thuchhuah siamin, rally hi November 28-ah Jantar Mantar-ah neih a ni dawn a ni,  a ti. Thuchhuah an siamah hian Garoland state hran chu hun rei tak an lo ngiat tawh a nih thu sawiin, state sorkar leh sorkar laipuiten an thil phut hi an ngaihven sak tawh lo niin an sawi. Mahse  Garo Hills leh a chhehvel biala chengte duhdan ang hi tihpuitlin ngei a nih theihna turin an bei zel dawn tih an sawi bawk.

Committee chuan rally hi boruak ṭha tak hnuaiah democracy dan ang takin kalpui a ni dawn tih an sawi.