Citizenship Bill tharin mipuite a tilungawi dawn : Assam FM

Assam finance minister Himanta Biswas Sarma chuan November thla hian Parliament-ah Citizenship (Amendment) Bill pharh a ni dawn tih a sawi. Bill pharh tura draft thar duan chuan hmarchhak mipuite a tilungawi tawh dawn a ni, a ti. 

Sarma chuan bill thar hian Article 371 leh Sixth Schedule a hnawl dawn lo a, tribal culture, ṭawng leh nihna humhalhna kaihhnawih dan hman mek pawh a nghawng buai dawn lo tih a sawi. Minister chuan Bill hian hmarchhak state ṭhenkhata hman mek, Inner Line Permit (ILP) system pawh a tibuai dawn lo tih a sawi bawk. 

"Hmarchhak state hrang hrangah hian tribal, an ṭawng leh culture humhalhna dang an nei mek a, sorkar laipuiin Citizenship Bill thar a duan tur hian heng dan hmante hi a nghawng dawn lo a ni," tiin Sarma chuan a sawi. 

Citizenship (Amendment) Bill, 2016 hi nikum khan BJP chuan Parliament-ah a pulut a, Lok Sabha-ah pass ni mah se Rajya Sabha-ah dan a ni. Mahse kumin kumtir lama Lok Sabha inthlanpuia hnehna an chan leh hnuah, BJP chuan Bill hi House-ah putluh leh ngei an tum tih an sawi. 

BJP kaihhruai North East Democratic Alliance (NEDA)-a convener, Sarma chuan Bill chungchangah hian hmarchhak state-a stakeholder hrang hrangte berawnin, an sawipui dawn tih a sawi. BJP senior leader-te pawhin hmarchhak state-te hi tlawh foin, an kawm kual a ni. October thla chhung pawhin party hruaitu dangte pawhin an la tlawh leh zel dawn tih sawiin, Parliament session neih leh hma ngeiin stakeholder-te chu sawipui kim hman an tum a ni, a ti. 

Sarma chuan tunhnaia Assam-a National Register of Citizens (NRC) final list tih­chhuah­ah BJP pawh an lungawi lo tih a sawi a, list hi ennawn a ngai tih sawiin, state sorkar pawhin NRC kalpui a nih dan chu ennawn vek a nih theihna turin Supreme Court-ah thlen a tum tih a sawi.