Drone hmangin hmarchhakah damdawi sem tum

North Eastern Council (NEC) chuan hmarchhak state pariata hmun kilkhawr, tlawhpawh harsatna hmunahte drone hmangin damdawi sem a tum. 

Hmarchhak bial hmun ṭhenkhatah hian thlai chi leh agricultural product ṭhenkhat semna kawngah drone technology hi hman a lo ni tawh a ni. NEC Planning advisor, Calvin H. Kharsiing chuan Shillong-a chanchinthar lakhawmtute a kawmnaah, drone hmanga damdawi mamawh zualte sem tum a nih thu regional consultation meet-ah a sawi a, Meghalaya-ah enchhin hmasak a ni dawn a ni, a ti.  Sorkar chuan hemi atan hian cheng vaibelchhe 10 a ruahman thu a sawi a ni. 

Kharsiing chuan hmarchhak state dangah pawh inkalpawhna kawng ṭha lo vanga tlawhpawh hleihtheih loha awm, damdawi lam indaih tawk loh leh supply awm ṭhat loh vanga harsatna tawk an awm fo tih a sawi. Regional consultation meet hi NEC leh UNICEF bakah Oxfam India-ten an buatsaih a ni. He meet-ah hian hmarchhak biala health sector chungchang sawiho a, mipuiten hriselna ṭha an neih theihna tura hmalakna leh inbuatsaih dan hrang hrangah an sawiho a ni.