Assam-in housing, education loan subsidy scheme tlangzarh
Bharatiya Janatiya Party (BJP) kaihhruai Assam sorkar chuan Thawhlehni khan housing leh education loan subsidy scheme a tlangzarh.
Heng loan subsidy scheme-te hi Assam finance minister, Himanta Biswa Sarma chuan tlangzarhin housing loan scheme bik hi “Aponar Apon Ghar”(Your own Home) tih a ni a, chhungkuain in an sak hmasak berah he scheme hnuaiah hian subsidy cheng nuai 2.5 thleng an dawng thei a ni. Loan hi nuai 5 aṭanga nuai 40 thleng an la thei thung.
Himanta Biswa Sarma chuan loan cheng nuai 5 aṭanga 10 inkar late tan nuai khat interest thleng subsidy pek a nih theih thu leh, nuai 10 aṭanga 20 inkar loan late chuan nuai 1.50 thleng subsidy an hmu thei dawn tih a sawi. Nuai 20 aṭanga 30 inkar late chuan nuai hnih thleng subsidy an hmu thei dawn a, nuai 30 aṭanga 40 inkar late chuan nuai 2.50 thleng an la thei thung dawn tih a sawi bawk.
An scheme tlangzarh thar hi tun financial year atan a ni a, Union finance minister Nirmala Sitharaman hmalakna aṭanga scheme hi siam thei an ni tih a sawi bawk a ni. Biswa Sarma hian education loan interest subsidy scheme a tlangzarh nghal bawk a, zirna sang zawk zirturte hnenah he scheme hi pek theih a ni dawn thung. Sarma chuan vawikhatah subsidy cheng sing nga thleng an pe thei dawn tih a sawi.