Manipur CM hluiin ILP kaihhruaina mumal tak siam duh ILP hman ṭan niah permit 163 pe chhuak

Sorkar laipuiin Manipur-a Inner Line Permit (ILP) system hman phalna a pek hnuah hman ṭan a ni tawh a, hetihlai hian chief minister hlui Okram Ibobi Singh chuan ILP pekchhuah dan turah kaihhruaina mumal tak siam a duh tih a sawi. 

Congress hruaitu Ibobi Singh chuan December 31-a ILP guideline tihchhuahah ‘indigenous people’ leh ‘permanent resident’ tihte chu sawifiah a ni lo a, heng pahnihte hian eng chin nge a huam tur pawh sawilan a ni lo, a ti. Congress party chuan ILP hi eng party mahin politics lama hlawkpuina tura an hman a duh loh thu sawiin, state mipuite chuan ILP chungchang hi an la hriatchian loh avangin rorellai leh eptu party-te chuan ṭha taka an sawiho a ngai a ni, a ti. 

Manipur sorkar chuan ILP hi January 2 aṭang khan pechhuak ṭanin, hemi ni hian permt 163 a pekchhuak a ni. A hmain ILP dilna hi 330 an lo dawng lawk tawh a ni. 

ILP hi state pumah hman a ni dawn a, a ram leilung fa (indigenous people) leh awm nghet (permament resident) tih loh chuan an dil vek a ngai dawn a, ILP pekchhuah hian ṭum khatah ni 15 chin a huam ang.