Tripura-ah Congress hruaitu pakua bang ve leh

Tripura Congress unit president Prahdyot Kishore Debbarman ban hnuah, an party hotu an thlawpna lantirin party hruaitu dang pakuain banna an thehluh ve leh. 

Nilainia banna thehlut zingah hian party vice president leh gene­ral secretary pawh an tel a ni. Debbarman chenna ina press meet an neihah, TPCC general secretary Sridam Debbarma chuan,"Maharaja Pradyot chuan Tripura-ah National Register of Citizens (NRC) kalpui a duh vang leh, party hruaitu eirute a thurualpui theih loh avangin party hotu a nihna aṭanga bang tura nawr luih a ni," a ti. District leh sub-division hrang hrangah pawh an party hruaitute pawh an la ban belh zel dawn tih sawiin, state mipuite ṭhatna tur leh an duhdan humhimna turin party thar pawh an din maithei tih a sawi. 

Debbarman an thlawp thu sawi nawn lehin, nikum assem­bly inthlanah khan Congress chuan vote tla aṭangin 1.5% chauh a hmu pha a, mahse Debbarman hi kumin February-a party president-a dah a nih hnuah an party chuan nasa takin hma a sawn a ni, a ti. Debbarman kaihhruaina hnuaiah kumin Lok Sabha inthlanpuiah khan Congress chuan vote tla 30% a lak phak thu a sawi a ni. 

Sridam Debbarma chuan AICC general secretary, in-charge of northeastern state, Luzinho Felerio chu bei zuiin, hruaitu corrupt tak a nih thu leh, hotu chan a chan chhung chuan an party chuan kum sawmnga chhung chu hmarchhak bialah hnehna an chan theih loh tur thu a sawi. 

Tripura lal thlah, Prahdyot Kishore Debbarman chuan Thawhṭanni khan Tripura Cong­ress president a nihna aṭanga a ban thu hi a sawi. Tripura-a NRC kalpui ve tura ngenna petition a thehluh chu party hotu lamin sut tura an tih thu leh, state party hruaitu ṭhenkhat nena inhriatthiam lohnate siamṭha tura an tih thu a sawi. Mahse an ngenna ang hi a tih theih loh vangin a nihna chelh aṭangin a bang ta tih a sawi a ni.