AHRC-in Assam doctor pawisa a chawitir

Assam Human Rights Com­mission (AHRC) chuan a damlo enkawlna kawnga inthlahdahah puhin, Guwahati-a doctor pakhat chu damdawi-ina damlo thi pakhat chhungte hnenah zángnadawmna cheng nuai nga pe turin a hriattir. 

AHRC bench, chairman Jus­tice V.Taiphei kaihhruai chuan damdawi-ina dam lo pakhat, Pinky Das thihna chhan chu doctor inthlahdah vang niin a sawi. Hei vang hian a enkawltu doc­tor chu damlo thi ta chhungte hnenah thla hnih chhung ngeia zangnadawmna cheng nuai 5 chu thla hnih chhunga pe turin a ti a ni. 

Commission chuan thupek a tihchhuahah, doctor hi sorkar chhawr lai a nih avangin a sum chawi tur pawh sorkar chuan peksanin, a hlawh aṭangin a inrulh tir leh thei a ni, a ni. AHRC hian Pinky Das-i pasal, Kamal Das-a'n a nupui thih danah complaint a thehluh avangin thubuai hi an ziaklut a ni. Complaint a thehluhah, Kamal Das chuan Dr Ghanashyam Thakuria thu anga a nupui hi injection pek leh enkawl a nih hnuah a thi niin a sawi. Commission chuan Director of Health & FW hnenah hemi chungchang hi chhui chian turin a ti a, anni chuan an chhui hnuah doctor-in damlo a enkawl danah hian inthlahdahna leh ngaihthahna thil a awm lo tiin a sawi. 

Hetihlai hian Commisision chuan hnungzang na avanga ringawta damdawi-ina admit, doctor damdawi chawh pek a nih hnua a thi mai chu mak a tih thu a sawi thung. Department lamin an chhuinaah doctor thiam lohna hmu lo mah se, he thil thleng chungchangah hian doctor chuan insawifiahna mumal tak a pek loh avangin commission chuan mawhphurtuah a ngai tho tih a sawi, hei vang hian sum chawi tur hian a ti a ni, a ti.