AP CM-in tourism tihchangtlun duh

Arunachal Pradesh chief minister Pema Khandu chuan State Tourism Department official-te chu Nilaini khan kawmin, infrastructure lam aiin tourism tihchangtlun leh chawisan lam chu ngai pawimawh zawk turin a ti. 

Itanagar-a Department official-te nena review meeting an neihah, CM chuan an state-in tourism lamah theihna sang tak nei mah se, kum eng emaw chen an state tlawhtu khualzin an pung ṭha lo chu ngaihpawimawh a ngai tih a sawi. 

State sorkarin non-engineering department hrang hrangah engineering wings siamte tihtawp a tum thu a sawi rualin, Khandu chuan hei hian tourism department pawh a huam thu leh, tourism depatment chuan construction lam ngawt a buaipui avangin khualzin pawh a hip lut thei tawh lo a ni, a ti. Hei vang hian department chuan an tihtur pawimawh ber, tourism lam chawikan a, khualzin tam zawk hip luh theih dan chu dah pawimawh hmasa a, in sak leh siam hna chu department dangte tih tura dah turin a ti a ni. 

Sorkar laipuiin hmarchhak biala inkalpawhna ṭha zawk siam chu a ngaih pawimawh a nih avangin, hei hi an state pawhin an lo hman ṭangkai thiam a, khualzin tam zawk hip luhna atana an hman ṭangkai a ngai a ni, a ti. Tualchhung miten khualzinte laka rilru puthmang dik lo an neih ṭhinte pawh thlak a ngai a ni, tiin CM chuan a sawi.