NE airport tihchangtlun nan Rs 3,500 project siam : AAI

Airport Authority of India (AAI) chuan hmar­chhak state-a airport tihlen leh tihchangtlunna atan cheng vaibelchhe 3,500 hu project siam a nih thu a sawi. Hmarchhakah hian airport hman mek 13 a awm thu a sawi bawk. 

AAI chuan Guwahati airport tan Rs vbc 1,250 rua­hmanin, Imphal (Manipur) tan Rs vbc 650, Agartala (Tripura) tan Rs vbc 500, Arunachal Pradesh-a Hollongi hmuna greenfield airport chei nan Rs vbc 650 leh Lengpui(Mizoram) tan Rs vbc 450 a dah a ni. 

AAI Regional Executive Director Sanjiv Jindal chuan, "AAI chuan project hi a rang thei anga kalpui a tum a ni. Tlang chhengchhiat dan leh, khawpui leh rel kawng siam dan hautak ziate ngaihtuahin, hmarchhak biala thlawhtheihna service hi a man a tlawmin, inkalpawhna awlsam ber a ni," a ti. Airport hrang hrang chu tunlai hmanraw thar hmanga thuam tum a nih thu sawiin, international airliner-te pawhin hmarchhak airport-te hi an rawn ngaihven ṭan tawh a ni, a ti. 

"Hmarchhak biala airport-te hi thlawhtheihna lian chite an luh theihna turin siam a tum a ni. Thlawhtheihna hmangin hmar­chhak bial leh ramdang, a bikin China, Hong Kong, Bangkok, Myanmar leh Bangladesh nena inkalpawhna tur hi ṭha zawka siam theih a ni a, hei hian tourism lamah pawh nghawng ṭha tak a nei dawn a ni," a ti. 

Hmarchhak state-a thlawh­theihna hmanga inkalpawhna ṭha zawk siam hna chu Regional Connectivity Scheme hnuaiah thawh a ni dawn tih sawiin, helicopter service pawh hmun tam zawkah kalpui tum a ni, tiin Jindal chuan a sawi. 

Jindal chuan Rs vbc 500 project hmanga Agartala Airport siamṭhat hna thawh mekah, India ramah a hmasa ber turin full body scanner chu dah a ni dawn tih a sawi. Agartala airport hi tunhnaiah Maharaja Bir Bikram Airport tia thlak a ni. Agartala airport runway meter 2,286 chu meter 3,000 a thuia siam a ni dawn tih a sawi bawk.