Tripura Congress-in an president hlui lakah defamation case file dawn

Tripura Pradesh Congress Committee (TPCC) chuan Ningani khan an party president hlui Pradyot Kishore Manikya Debbarma lakah an party a tihhmingchhiat avangin defamation case an file dawn tih an sawi.

Congress hruaitu hlun Subal Bhowmik chuan an pesident hlui Pradyot chuan an party a tih hmingchhiat vang leh Congress hruaitu zawng zawng, dawheh, eiru leh misuala a puh avangin a lakah thubuai an ziah luh dawn thu a sawi.  

Pradyot-a ban chhan pawh chu ruahman lawk vek a ni tih sawiin, a hmain a nu Bibhu Kumari Devi nen BJP hruaitu lu Amit Shah Delhi-ah an hmu tih a sawi. Mi ṭhenkhat chuan Amit Shah an hmun theihna tur hian Assam finance minister Himanta Biswa Sarma chuan ruahmanna a siam sak ni ten an sawi bawk. 

Bhowmik chuan an president hlui banna chuan an party-ah nghawng a nei dawn lo tih sawiin, Congress thlawptute chuan an la thlawp chhunzawm zel reng dawn tho tih leh state-a sorkarna siam leh tur pawh an nih thu a sawi a ni. 

"Kan president hlui khan tumah rawn loin tunhma lama kan lo inhmuhthiam loh pui tawh Ranjit Debbarma leh Ananta Debbarma-te chu party meeting-ah leh press conference-ahte a rawn hruai lut a ni. Heng mite hi Congress member pawh an ni lo. Congress party chu a mimal thil ang maiin a ngai a, kan CM nen pawh an inbe pawp reng bawk. Media lama kan ṭhiante pawhin CM chenna ina an chawkil dunte pawh an hmu fo a ni," a ti.

Congress party chu national party a nih thu leh an policy-te pawh mi zawng zawng tan a ni a, Debbarma communal activity-te chuan an party a tihmingchhe zawk a ni, tiin Tripura Congress vice president Subal Bhow­mick chuan a sawi.