AP-ah party pangain independent candidate an thlawp dawn

Arunachal Pradesh-a Khonsa West assembly by-election, October 21-a neih turah political party panga chuan independent candidate Chakat Aboh an thlawp dawn.

May thlaa assembly inthlana Khonsa West bial aṭanga thlan tlin, People's Party of Arunachal (PPA) can­di­date Tirong Aboh chu inthlan result puan hmain NSCN helten Tirap district-a 12 Mile area-ah an kaphlum a ni. Hei vang hian by-election hi buatsaih a ngai dawn a, a nupui Chakah Aboh chuan independent candidate angin inthlan hi chuh a tum a ni. 

Kar kal ta Inrinni khan chief minister Pema Khandu chuan a office-ah all-party meeting a ko a, meeting zawha thuthar thehdarhtuten an kawmnaah PPA candidate chu rorellai BJP bakah Congress, National People's Party (NPP) leh Janata Dal  United (JDU)-in an thlawp tur thu hi a puang a ni. 

Khandu chuan, "Meeting-ah hian political party-te chuan candidate hran siam loin, inde­pendent candidate hi an thlawp dawn tih an sawi a ni," a ti. Khan­du chuan candidate dang an awm a nih pawhin, Tirong Aboh zahna kan hlanna pakhat atan, a nupuiin hnehna a chan ngei theihna turin party hrang hrangte chuan theihtawp kan chhuah dawn a ni," a ti. 

Tirong Aboh thah a nih dan chhuitu, National Investigation Agency (NIA) chuan mi pahnih an man tawh thu Khandu chuan a sawi bawk. He thubuai hi state sorkar chuan June thla khan NIA kutah hian a hlan a ni.