Indo-Bangla border fencing zo turin ngen

Tripura chief minister Biplab Kumar Deb chuan union home minister Amit Shah hnenah India-Bangladesh ramri kaltlanga ruihhlo tawlhruk ṭhin leh, dan kalha ramri kan awm ṭhinte venna turin ramri hung hna hi zo fel thuai turin a ngen. 

Border Security Force (BSF) official-te chuan Tripura leh Bangladesh inrina, international border km 856-a thui zinga km 790 chu hung zawh a ni tawh tih an sawi a ni. CM Deb hian kar liam ta khan New Delhi-ah union minister Shah hi a hmu a ni. Deb hian Amit Shah a hmuh hma hian BSF leh Tripura police official te, district thuneitute hmuin, ramri hung hna kalpui mek chungchangte hi a sawipui. CM chuan official-te hnenah an hnathawh tihkhaihlak tumna chu en liam mai mai lo turin a chah bawk. 

Hetihlai hian Tripura Home depart­ment chuan ramri hung hna thawh mekah, a hungna tur chin lehlama an state mi leh sate chenna in, an leilet leh ram eng emaw zat a awm a, hei vang hian chhungkaw tam takin harsatna an tawh phah tih an sawi. 

India sorkar chuan kum 23 liam ta aṭang khan India-Bangladesh ramri, km 4,096-a thui hi a hung ṭan a, flood lights-te a dah bawk. Hei hi ramri kaltlanga dan loa India rama luh tumte danna atan leh, ruihhlo tawlhruk leh dan loa sumdawnna kalpui ṭhin venna atana a tih a ni.