Assam CM-in Diphu Medical College-ah MBBS course academic session hmasa ber hawng

Assam chief minister Sarbananda Sonowal chuan Thawhlehni khan Diphu Medical College and Hospital-a MBBS  course academic session hmasa ber a hawng. 

Academic session hmasa ber hawnna inkhawm buatsaihah hian education minister Himanta Biswa Sarma, mines & minerals minister Sum Ronghang, urban development minister Pijush Hazarika, Diphu MP Horen Singh, Karbi Anglong Autonomous Council CEM Tuliram Ronghang leh sorkar mi pawimawh dangte pawh an tel. 

Education Minister chuan Diphu Medical College-a MBBS course ṭan a ni thei ta chu lawmawm a tih thu sawiin, thawktu leh zirlai zawng zawngte duhsakna a hlan. Diphu Medical College hi kum 2019, November 25 aṭang khan hawn ṭan a ni a, Assam-a medical college pasarihna a ni. He college hi state ministry of health and family welfare hnuaiah awmin, Medical Council of India pawhin a pawmsak tawh bawk. Kum 2020-21 atan undergraduate zirlai 100 an awm mek. 

CM chuan Karbi Anglong district-in an district chhunga health care delivery system ṭha an lo phutna chu medical college thar hian a rawn tihlawhtling ta tih sawiin, state leh a bikin district mipuite tan sorkar chuan harsatna tam tak hmachhawn chungin Diphu Medical College and Hospital hi a din tih a sawi. Diphu-ah hian state sorkar chuan Law College a din leh dawn tih sawiin, state chhunga hmun hrang hrangah zirna tihhmasawnna turin a kaihhruai sorkar chuan theihtawp a chhuah mek zel a ni, a ti. Kum 2016-a Assam-a BJP sorkar a din aṭangin district tina hmasawnna khairual taka kalpui chhoh a nih thu sawiin, "Assam hi India rama state hmasawnna  leh tha ber zingah siam kan tum a ni," a ti. 

Assam hian medical college pasarih a nei tawh a, chungte chu - Gauhati Medical College & Hospital, Guwahati; Assam Medical College & Hospital, Dibrugarh; Silchar Medical College & Hospital, Silchar; Jorhat Medical College & Hospital, Jorhat; Fakhruddin Ali Ahmed Medical College & Hospital, Barpeta; Tezpur Medical College & Hospital, Tezpu leh Diphu Medical College & Hospital, Diphu te an ni.