Lungalhthei khura thi chhungte Rs nuai nga pe dawn

Meghalaya-a lung­alhthei khura thi, mi paruk chhungte hnenah zangnadawmna cheng nuai nga ṭheuh pek an ni dawn tih National Green Tribunal (NGT)  committee chuan a sawi. 

NGT committee hruai­tu, Justice BD Agarwal chuan Thawhlehni khan Shillong-ah meeting neiin, mitthi chhungte hnena zangnadawmna pek tur zat hi an rel tih a sawi. 

January 21 khan East Jaintia Hills district-a lungalhthei khur chhungah hnathawktu paruk chu an chuanna crane a chah avangin an thi a ni. Thi zinga pathum hi unau an ni. He khur hi phalna nei loa siam a ni bawk. 

Justice Agarwal chuan Thawhṭanni khan chetsualna thlenna hmun hi a tlawh a, committee chuan phalna nei loa siam, lungalhthei khur neitu leh hnathawktu chungchang chu chhui chiang tur leh, a ṭul anga action la turin police pawh a hriattir nghal tih a sawi.