Healthcare worker-ten Manipur CM office luhchilh tum

Manipur health department hnuaia Covid-19 healthcare worker, contract-a chhawr mekte chuan an service pawhsei phutin Thawhlehni  khan Chief Minister Secretariat luhchilh an tum a, mahse police-ten an lo dang a ni. 

State chhunga hri kai leh hripui thihpui an pun chhoh zel avangin thawktu indaih lohna phuhruk nan state  health department chuan nikum August thla khan staff nurse 150, multitasking staff (MTS) 100 leh medical officer 74-te chu contract-in thla thum atan a la a ni. An service hi November 2020 khan thla thum dang pawhsei sak niin, hei pawh hi February 2 khan a tawp leh tawh a ni.

An service tawp ni, Thawhlehni khan contract-a chhawrte hian an service pawhsei sak tur leh, sorkarin thla li hlawh a la pek loh chu pe fel vek tura phutin CM office-ah an kal a ni. Hemi hma, Thawhṭanni khan an thil phut tihhlawhtlin phutin Imphal-ah sit-in protest an lo huaihawt tawh bawk. 

Nawrh huaihawtte hi police-ten CM Secretariat aṭanga meter 100 vela hla, Nupi Lal Memorial Complex-ah an lo dang a, CM hmuh an duh chuan appointment la phawt turin an ti. Mahse healthcare worker-te hian appointment an hmuh theih tak loh avangin an kaldarh ta a ni. 

CM-in appointment a siamsak duh loh chu an lungawi lo hle tih sawiin, hri leng avanga an state-in harsatna nasa tak a tawh laia Covid care centre hrang hranga an hnathawkte chu sorkar chuan a theihnghilh sak tawh niin an sawi. "Kan nunna thapin, hri kaite nunna chhanhim nan theihtawp kan chhuah a, Covid care centre  hrang hrangah kan thawk a ni," tiin, an hnathawhna avang hian tualchhung lamah pawh hri hlauh vanga enhran te pawh an lo tawh phah tawh thu an sawi. An zinga eng emaw zat chuan an hnathawhna aṭangin hri pawh an kai niin an sawi bawk.