AASU aiawhten Golaghat Engineering College an tlawh

All Assam Students’ Union (AASU) general secre­tary, Lurinjyoti Gogoi hoin Thawhlehni khan AASU aiawhten Golaghat-a Golaghat Engineering College (GEC) an tlawh. 

Lurinjyoti Gogoi chuan sorkar laipuiin 'Skill India' a buaipui mek laia khar mai theih dinhmuna GEC a ding chu thil zahthlak tak a ni, a ti. College infrastructure-te chu ṭha viau mah se, Assam sorkarin a ngaihthah avangin tawp mai thei dinhmunah a ding mek tih a sawi. Mahse hei hi AASU chuan a remti ngai dawn lo tih sawiin, GEC chuan engineering college ṭha tak ni turin infrastructure lam pawh a nei ṭha tawk a ni, a ti. 

Assam-ah chuan technical college dangte pawhin harsatna an tawk mek tih AASU hruaitu chuan a sawi. Library, teaching leh office staff indaih lo, infras­truc­ture ṭha tawk lo leh laboratory instrument hlui tawh tak takte chu sorkar hnuaia technical college hrang hrangten harsatna an tawhte a nih thu a sawi. 

State sorkar chuan enginee­ring college aṭanga zirchhuakte placement chungchang pawh a ngaihtuah pui ṭha lo niin Gogoi chuan a sawi. Sorkar chuan Assam hmasawnna turin engineer ṭhate chu a chhawr ṭangkai thiam tur a ni a, mahse hemi kawngah hian sorkar chu a hlawhchham a ni, a ti. 

AASU chuan Assam sorkar leh state education minister Siddhartha Bhattacharya hnenah Golaghat Engineering College chuan All India Council for Technical Education (AICTE) hnen aṭanga pawmpuina a hmuh theihna tura a theih anga hma la turin a ngen bawk. 

GEC hi kumin February thla khan chief minister Sarbananda Sonowal-an a hawng a ni. College awmna ram hi bigha 110-a zau a ni a, cheng vaibelchhe 46.68 senga sak a ni. Civil, mechanical leh che­mical engineering branch-te a awm. College-ah zirlai 92 an awm mek. 

March thla khan expert-ten college hi tlawhin an endik a, AICTE criteria an zawm kim loh avangin recognition an dilna chu an hnawlsak a ni.