Assam-in zirtirtu 29,700 la thar dawn

Assam education minister Dr. Himanta Biswa Sarma chuan vawiinah Assam sorkar chuan zirtirtu 29,700 a la thar dawn tih a sawi. 

Minister chuan primary school 1,698 provincialised an ni dawn tih sawiin, hei hi lower primary leh LP zirtirtu 3,309 ten an hlawkpui dawn a, ME school 2,017 provincialise ni bawkin, zirtirtu 6,586 ten an hlawkpui dawn bawk tih a sawi. Zirtirtute zinga professional qualification nei lote chu tutor anga dah an ni ang, a ti. 

Sarma chuan zirtirtu 2,269 awmna High School 264 provincialised a ni dawn bawk a, hei bakah hian zirtirtu 31 awmna Higher Secondary school awmna pali provincialised an ni dawn bawk. Senior Secondary/Junior College level 192 provincialised an ni ang a, henga zirna ina thawktu, teaching leh non-teaching staff 2,306 te chuan hamṭhatna hi an dawng thei bawk ang. 

Higher Secondary level-ah college 33 provincialised an ni dawn bawk a, hengah hian teacher leh non-teaching staff 693 an awm. Zirtirtu hna  thawk mek, professional qualification zo tawh mi 900-te chuan sorkar hmalakna hnuaia hamṭhatnate hi an chhawr ve thei dawn bawk. 

Minister chuan provincialised tur zinga tun ṭuma la tel lo school list dang buatsaih a ni leh dawn tih sawiin, he list-ah hian zirtirtu 16,484 vel an awm dawn a ni, a ti. "Provincialisation hi kalpui mek a ni a, hnathawh ṭhenkhatte ennawn mek an ni bawk. A thawh khatnaah hian ṭhenkhat chu hmaih an ni a, mahse heng mite pawh hi a list thawh hnihnaah telh an nih dawn avangin lo hlauthawng suh se," tiin a sawi. Zirtirtu lak thar hna hi thawh thumin,  Directorate of Secondary Education, Directorate of Primary Education, leh  Sarba Shiksha Abhiyan (SSA) hnuaiah kalpui a ni dawn tih a sawi a ni.