Assam tuilianin kam lam pan zel
Assam district hrang hranga tuilian chuan kam lam a pan zel a, Nilaini thleng kha chuan mi 5,18,623 velin tuilian hi an la tuar thung.
Assam State Disaster Management thuneitute chuan thuchhuah an siamah Nilaini thleng khan district 12, revenue cirlce 26-a khaw 691 chuan tuilian hi an la tuar tih an sawi. Dhemaji, Lakhimpur, Darrang, Barpeta, Nalbari, Chirang, Kokrajhar, Goalpara, Kamrup, Morigaon, Nagaon leh Jorhat district-te chu tuilian tuar zingah hian an la tel a ni.
Barpeta, Chirang, Morigaon, Nagaon leh Jorhat district-ahte chuan relief camp 374 siam a la ni a, mi 18,890 vel chu heng chhawmdawlna hmunah hian an cheng mek. Barpeta, Kokrajhar leh Kamrup district-ahte chuan chhawmdawlna pekna centre 62 siam a ni bawk.
Thawhlehni aṭang kha chuan tuilian vanga nunna chan report a awm tawh lo a, tuilian hian kam lam pan zel mah se lui eng emaw zatah chuan hlauhawm chhinchhiahna aia sangah tui an la luang a ni.