Tripura panchayat inthlanah BJP-in seat 95% la

Tripura-a panchayat inthlan neihah rorellai, BJP chuan seat awm zat aṭanga 95%-ah hnehna a chang.  

Panchayat inthlan hi July 27 khan neih a ni a, inthlan hma hian BJP chuan gram panchayat-a seat 6,111 aṭangin seat 5,728, panchayat samiti-a seat 419 aṭangin 337 leh zila parishad-a seat 116 aṭangin seat 37-ah chuhtu awm loin hnehna a lo chang tawh a ni. 

Inthlana vote tla hi chhiar a nih laiin Unakotir district  headquarters, Kailasharh-a Congress leh BJP worker-te inkarah buaina a chhuak. Security force-te chuan tiang nen mipui pungkhawmte hi an hnawtdarh thei hram a ni. Buaina chhuak vang hian hliam tuar mi pali an awm. Hmun dangah erawh chuan vote chhiar lai hian boruak duhawm lo thleng a awm lo. 

BJP chuan gram panchayat, panchayat samiti leh zila parishad-a seat awm aṭanga 95% zet an la thei chu lawmawm an tih thu sawiin, mipui chungah lawmthu an sawi. Hetihlai hian eptu party Congress leh CPI(M) chuan BJP chuan inthlannaah in-candidate leh campaign ve lo turin eptute an vau tih an sawi thung.