Rahul Gandhi-a'n Assam-ah campaign ṭan dawn

Congress party hruaitu Rahul Gandhi chuan Assam assembly inthlan neih tur atan February 14 hian Upper Assam-a Sivasagar-ah campaign bul ṭanin, rally a nei dawn. 

All India Congress Committee (AICC) hotute chuan Gandhi hian February thla hian Assam-a meeting vawi li vel a nei dawn tih an sawi a, party general secretary Priyanka Gandhi pawhin campaign tur hian beisei a ni a, mahse  tihchian a la ni lo. 

Congress hruaitu lute hi Assam-ah la campaign ṭan lo mah se, BJP erawh chu an hruaituten an tlawh fo tawh a, prime minister Narendra Modi, union home minister Amit Shah leh BJP national president JP Nadda-te pawhin an tlawh tawh a ni. PM Modi chuan January 23 khan Sivasagar-ah public meeting a nei a, February 7 hian Sonitpur-a Dhekiajuli pawh a tlawh leh dawn a ni. 

Assam assembly inthlan hi March/April velah neih rin a ni a, inthlanah hian BJP kaihhruai ṭangrual pawl leh Congress kaihhruai ṭangrual pawlte chuan hnehna chan ngei tumin theihtawp an chhuah mek. Assembly seat 126 awmah seat 100 chuang lak theih an tum tih an sawi ve ve a ni.