Tripura adhoc teacher-te ban vek dawn

Kum nga chhung zet an buai hnuah, Supreme Court chuan Tripura adhoc teacher-te thubuai chungchangah thutlukna a siam ta. Adhoc teacher 10,323-te chu SC-in hun a pek belh a tawp hnuah ban an ni vek dawn.

Tripura sorkarin adhoc teacher 10,323-te a lak chungchangah court-ah petition eng emaw zat thehluh a ni. Chief justice hlui Deepak Guta kaihhruaiin Tripura High Court division bench chuan an service hi alo tihtawp sak tawh a ni.

Mahse Tripura sorkar hmasa, Left Front sorkar khan High Court thupek hi a khing let a, hun rei tak an buaipui hnuah Supreme Court chuan High Court thupek hi a pawmpui ta a ni. Kum 2018, March thlaa Tripura-a BJP-IPFT sorkar a din khan, special petition a thehlut a, zirtirtu indaih lohna avangin adhoc teacher-te service pawhsei sak a dil. Hemi hnu hian Supreme Court chuan March 31, 2020 thleng atan an service pawhsei sak a remti a, hemi chhung hian zirtirtu indaih lohna avanga harsatna an tawhte chingfel tura state sorkar hmalak dan chu a thlithlai reng tur thu a sawi. 

Kar kal ta Zirtawpni khan Supreme Court chuan adhoc teacher-te buaina chungchangah thutlukna a siam ta tih sawiin, law minister Ratan Lal Nath chuan court thutlukna chu an zawm dawn tih a sawi nghal bawk. State Education Department chuan adhoc teacher-te service hi tihtawp a nih hnuah, zirtirtu indaih lohna phuhrukna turin TET kaltlangin zirtirtu lak a tum a, hemi atan hian dilna pawh 90,000 zet a lut tawh a ni. Zirtirtu lak thar turte hi October emaw, November emaw hian tihfel hman tum a ni.