Hmarchhak tan Ni 100 chhungin project 200 siam dawn

Development of North Eastern Region (DoNER) minister Jitendra Singh chuan prime minister Narendra Modi kaihhruai NDA sorkar chuan sorkar laipuiin lakluh a nih aṭanga ni 100 chhungin hmarchhak bial tan, cheng vaibelchhe 3,000 hu pro­ject 200 a siam dawn, tiin Pathianni khan a sawi.  

Jitendra Singh chuan India ram hmun dang leh hmarchhak bialte inpawhna ṭha zawk siamna turin DoNER ministry chuan action plan a siam tih a sawi bawk. DoNER-in 100 days action plan a siam zingah hian cheng vaibelchhe 3,000 hu project 200 kalpuina tur a tel thu sawiin, PM Modi-a kaihhruai sorkar chuan hmarchhak bial tihhmasawnna tur chu a dah pawimawh ber a ni, a ti. 

Singh chuan NDA sorkar hmasa khan hmarchhak bialin ramchhung hmun a hnaih theihna ringawt kha a tum ber a ni lo a, a tum tak chu ramchhung hmun dangten hmarchhak bial an pawh leh an hnaih zawkna tur a ni, tiin a sawi bawk. Hei hi NDA sorkar thar hian a chhunzawm leh tur thu a sawi. 

DoNER action plan hnuaia project pawi­mawh duan zingah hian cheng vaibelchhe 50 senga Assam-a Dima Hasao dis­trict-a bamboo indus­trial park siamna tur a tel. Hei bakah hian scheme hrang hrang, Non Lapsable Central Pool of Resources (NLCPR) Scheme, special package leh North Eastern Council (NCE) scheme hnuaia project 36 thawh, cheng vaibelchhe 529.18 man pawh zawh fel a ni tawh bawk. Project pahnih, cheng vai­belchhe 89.63 hu leh a dang pathum, cheng vaibelchhe 26.83 hu chu thawh mek an ni.