AP: Minister-in anti-riot vehicle a vailiam

Police thuam chakna leh tihchangtlunna tur peng pakhat atan Arunachal Pradesh sorkarin police-te hman tur anti-riot vehicle panga a pek chu nimin khan home minister Bamang Felix-a'n a vailiam. 

Anti-riot vehicle, Vajra tih hi minister hian Itanagar-a police headquarters aṭangin a vailiam a, he hunah hian DGP Rajendra Pal Upadhyaya leh police senior official-te an tel. Vajra panga zinga pahnih hi Itanagar Capil Complex-ah dah a ni dawn a, Papum Pare district, East Siang district leh West Kameng district-ahte pakhat ṭheuh dah an ni bawk ang. Minister chuan Vajra panga dang pawh pek leh thuai an ni dawn tih a sawi. 

DGP RP Upadhaya chuan Vajra chu police-ten buaina leh intualvuakna thlenna hmuna hman ṭhin a ni tih sawiin, a motor hi a him ṭhain buaina chhuahna hmunah pawh police-te pawh a venghim thei dawn a ni, a ti. Hemi rual hian ṭul tawpah lo chuan hman a ni lo ang, tiin a sawi bawk. 

SP (Telecom & Planning) Manoj Kumar Meena chuan Vajra chu an state-in an hman vawikhatna tur a ni tih sawiin, he motor hi a bik taka thuam a ni a, tear gas kahchhuahna tur automatic multi-barrel launcher leh darkar rei tak daih tur battery backup pawh a awm tih a sawi.