Silchar Medical College-in damdawi-in thar nei dawn

Assam health minister Himanta Biswa Sarma chuan nimin khan Silchar Medical College and Hospital-a khum 500 awmna tur, damdawi-in siam belh chu state sorkar chuan a pawmpui tawh thu a sawi.

Himanta Biswa Sarma chuan a twitter-ah Silchar Medical College chu a hlui tawh thu leh hmun pakhat phei chu siamṭhat theih pawh a nih tawh loh thu a ziak. Hemi ngaihtuah reng chung hian khum 500 awmna tur damdawi-in sak belh chu sorkar chuan an remti ta tih a sawi bawk.

Silchar Medical College and Hospital hi Barak Valley-a damdawi-in upa ber zinga mi a ni tawh a, kum 1968-a din tawh kha niin, khum 806 a awm a ni. Biswa Sarma hian kum thum chhung­in khum 500 awmna damdawi-in Assam-ah sak belh a ni dawn tih a lo sawi tawh a, heng zingah hian  Kokarjhar Medical College, Nalbari Medical College leh Tinsukia Medical College-te pawh an tel tih a sawi.

Dhubri, Lakhimpur, Nagaon leh Diphu-ahte pawh damdawi-in sak belh a ni dawn tih a lo sawi tawh bawk. Silchar Medical College-a damdawi-in an sak belh tur hi cheng vaibelchhe 96.05 vel senga sak tur a ni. Assam hi hmarchhaka medical college nei tam ber state niin- Gauhati Me­dical College, Assam Medical Co­llege, Silchar Medical College, Tezpur Medical College, Jorhat Medical College leh Barpeta Medical College-te an nei.