Regional Identity aiin sakhuana a pawimawh zawk: Assam RSS Chief

Assam-a Rashtriya Swayamsevak Sangh (RSS) Chief Ranjit Barma chuan hmarchhak mipuite tana thu dengkhawng tak tur mai sawichhuakin khawvel hmun hrang hranga Hindu-te chu India-ah pawm an nih reng thu a sawi.

RSS hruaitu chuan January 20 khan Citi­zenship Amendment Bill, 2016  an pawm thu leh regional identity aiin sakhuana chu a pawimawh zawk thu a sawi a, Hindu-te tan chuan India chu an ram a nih thu leh Hindu zawng zawngte in chu India a nih thu a sawi. 

Prime Minister Narendra Modi pawhin hetiang lam hawi deuh hian tunthla tira Assam a tlawh ṭum pawh khan thu a sawi niin tarlan a ni bawk.

Hmarchhak hmun hrang hrangah nasa taka bill dodal a nih laiin RSS hotu in hetiang thu a sawichhuak hi dem a hlawh hle rin a ni. Tun dinhmunah chuan Afghanistan, Bangladesh leh Pakistan aṭanga ramchhunga lo lut minority community-te chiah Citizenship Amendment Bill, 2016 hian la huam mah se dodalna a nasa hle a, BJP thawh­pui AGP pawhin an thawh­dunna an titawp hial a ni.

RSS student wing  Akhil Bharatiya Vidyarthi Parishad (ABVP) pawhin tunhnaia thuchhuah an siamah bill dodaltute chu Naxal leh anti-social ti tein a sawi bawk. Hmarchhakin nasa takin do mah se ABVP hian bill hi an thlawp thung. 

Hetihlai hian Meghalaya Chief Minister Conrad Sang­ma chu Citizenship Amend­ment Bill chungchanga Prime Minister hmu tura a kal chu a hlawhchham avangin Pathianni khan Shillong-ah a kir leh nia tarlan a ni bawk.

Hemi anih avang hian NPP chu BJP nen an thawhdunna aṭanga inhnukdawk tura nawrna a nasa hle nia sawi a ni.