Tripura: Kristian 96 Hindu-ah inlet

Tripura-a Unakoti district-ah Pathianni khan Kristian 96 chu Hindu-ah an inlet tih right-wing group Hindu Jagran Manch-te chuan an sawi.

Vishwa Hindu Parishad (VHP) chuan heng Hindu-an inlet Kristiante hi tunhma chuan Hindu an ni ṭhin tho tih sawiin, tihluihna avangin hun kal tawhah khan Kristian­ah inleh luihtir an nih thu leh tunṭuma an inleh pawh hi an duhthu reng a nih thu a sawi a ni.

VHP chuan heng mite hi thingpui huana thawk, tribal community mite an nih thu sawiin, Jharkhand leh Bihar aṭanga Tripura-a pem lut an nih tlangpui thu a sawi bawk.

Kristian Hindu-a inlet 96-te hi  Jharkhan leh Bihar mi, Orao leh Munda tribal community-te an ni hlawm a, Hindu Jagran Manch activist-te chuan an ziak leh chhiar thiam lohna leh an retheihna remchanga hmanga Kristiana inleh luihtir an nih thu an sawi.

Hetihlai hian Home Minister Rajnath Singh chuan kar liamta lawk khan New Delhi-a 'The Festival of Peace'-a thu a sawinaah a huhoa sakhaw danga inleh huk awm ṭhin chu a ngaihmawh thu sawiin, sakhaw zalenna chu a thlawp thu a sawi thung.