Assam-in thingpui huana thawkte hlawh tisang dawn
Assam finance minister Himanta Biswa Sarma chuan Inrinni liam ta khan an state-a thingpui huana thawk, tea garden worker-te hlawh chu ni 10 chhung ngeia tihsan a ni dawn tih a puang.
Inrinni khan tea garden worker-te chhawmdawlna tur sum semna hun hman a ni a, he hun hi union finance minister Nirmala Sitharaman chuan a hmanpui a ni. Tea garden worker 7,46,667 hnenah Rs 3,000 ṭheuh sem an ni.
Chief minister Sarbananda Sonowal chuan tea garden worker-te minimum wage tihsanna tur rawtna hi cabinet meeting neih leh hmasa berah tihfel a ni dawn tih a sawi.
Minister Sarma chuan Assam-a BJP kaihhruai sorkar chuan thingpui huan siamna leh a chhehvelah cheng vaibelchhe 1,400 sengin kawngpui a siamsak tawh tih a sawi a, hei bakah hian hnathawktu fate tan school eng emaw zat hawn a ni tawh bawk a ni, a ti. CM Sonowal kaihhruai sorkar chuan thingpui huana thawk nu naupai lai 47,000 hnenah ṭanpuina Rs 12,000 ṭheuh a lo pe tawh bawk tih a sawi. Assam-ah hian thingpui huan, a lian/zau hi 800 vel leh a zim deuh hlek nuai 1.18 a awm a ni.
Assembly inthlan nei tura inbuatsaih mek, Assam-ah hian rorellai BJP kaihhruai sorkar chuan state chhunga section hrang hrangte ṭanpui leh chhawmdawlna tur scheme a puangzar nasa tawh hle. Zirtawpni liam ta khan zirtirtu 29,701 la tharin, education minister Himanta Biswa Sarma chuan appoint letter hi Guwahati-a Sarusajai stadium-a inkhawm buatsaihah a sem nghal.