Article 371 ṭhiah a ni ve dawn lo: Amit Shah

Union home minister Amit Shah chuan Thawhlehni khan Article 371 chu ṭhiah a ni ve dawn lo tih sawiin, Articles 370 nena khaikhintute chuan mipui rilru hruaikawi an tum mai a ni, a ti.

Thawhṭanni-a Article 370 ṭhiah a nih hnu aṭang khan Article 371 chu ṭhiah ve leh mai a nih hlauthawngtu an tam hle a, zawhna pawh a tam nghal hle. Article 371 hi ṭhiah a nih chuan state eng emaw zatin an tuar dawn a, chung zingah chuan hmarchhak state-te pawh an tel a ni. Hemi a nih avang hian Lok Sabha-ah pawh zawhna an zawt nasa hle.

Amit Shah chuan eptute chu ram mipuite rilru hruaikawi tumah a puh thung a, Article 370 leh 371 tehkhin phet an tum niin a sawi. Home Minister chuan hemi chungchangah hian inhnialna chhan tur a awm lo a ni, a ti.

Congress leader Manish Tewari chu hemi chungchanga zawhna zawt hmasa ber tu a ni a,  Lok Sabha-ah chuan Con­stitution-in Article 370 chauh ni lo - Nagaland,  Assam, Manipur, Andhra, Sikkim leh state dang eng emaw zat special rights petu Article 371 a la awm tih a sawi a, "Vawiinah Article 370 in ṭhiat a, heng state-ahte hian eng thu nge in thawn ? Hmarchhakah president's rule kalpuiin, an Assembly dikna chanvo hmangin Parliament-ah Article 371 pawh in ṭhiat thei," a ti.

All India Majlis-e-Ittehad-ul-Muslimeen member Asaduddin Owaisi pawhin zawhna zawtin, Jammu and Kashmir chu dik lo taka enkawl bik an nih thu a sawi a, "Naga-te chuan an ralthuam an dahthla duh lo chungin sorkar chuan inbiakna a kalpui reng a, engati bik nge?" tiin a zawt ve bawk.

NCP leader Supriya Sule pawhin Home Minister hnenah zawhna zawtin, Article 371 chungchanga sorkar hmalak tumdan sawichiang turin a ti. "Ka rilrua zawhna lo lut chu Naga framework chungchang a ni. Jammu and Kashmir ang ruahmanna hi a awm em?" tiin a zawt a ni.

Congress MP Shashi Tharoor pawhin sorkar chuan president's rule leh parliament-a majority hmanga Constitutional provision a chungtlak thei a nih chuan, Article 371 ṭhiah a nih lohna turin sorkarin eng nge hmarchhakte a tiam theih? tiin zawhna a siam ve bawk.

Union Home Minister chuan  Article 370 ṭhiah an ṭum chhan chu Parliament thuneihna a tihnep vang a ni, tiin a sawi.

Hemi hnu hian  Article 371, 371 (A) for Nagaland, leh 371 (B) for Assam-te chu chhiarchhuak zuiin, "Engvangin nge kan paih ang? Ram inpumkhatna daltu a ni hleinem. Article 370 leh Article 371 in khaikhin chhan chu ram mipuite rilru in hruaikawi duh vang a ni," tiin a chhang let. Narendra Modi sorkar chuan Article 371 chu paih tumna an nei lo tih a sawi bawk.