Tripura sorkarin zirtirtute inthuam dan duang

Tripura sorkar chuan Vidyajyoti mission thar a kalpuina hnuaiah, school-a zirtirtu leh non-teaching staff-te thawmhnaw inbel dan tur pawh a duang tel nghal. 

Sorkarin kaihhruaina thar a siamah hian primary, upper primary leh secondary level teacher-te inthuam dan tur a hran ṭheuha siam a ni a, hei hi zawm ngei tur pawhin an ngen nghal bawk. 

Zirtirtu mipa-te chu formal shirt, pants, suit, sweater,  jacket/blazer leh button collar shirt-te inbel tura tih an ni a, hmeichhiate chu sari leh blouse, salwar suit leh traditional dress-te an inbel phalsak an ni bawk. Mipa leh hmeichhiate pawh pheikhawk formal bun tura tih an ni bawk a ni. 

Non-teaching staff-te chu jeans, kekawr dawr fual leh a ṭet, yoga pant-te inbel lo tura tih an ni a, naupangte rilru lapeng thei tur hair-style dangdai, hair colour, tattoo-te hmang lo tura tih an ni. 

Education minister Ratan Lal Nath chuan education chu professional field, zirtirtu leh thawktu dangte pawh an thawmhnaw inbel kawnga zahawm taka awm ngaihna a ni a, campus boruak leh zirlaite rilruah nghawng ṭha zawk thlen thei tur zawnga an awm a ngai a ni, a ti. Zirtirtu inthuam dan chuan naupangte zirna kawngah nghawng a nei ṭhin a ni, tiin a sawi.