NFR-in pawisa chawitir aṭangin Rs nuai thum chuang hmu tawh

Northeast Frontier Railway (NFR) chuan rel station leh a chhehvela bawhhlawlh paihte sum an chawitir aṭangin, kum 2018 October thla aṭang khan Rs 3,65,895 a hmu tling tawh. 

Chief Public Relation Officer PJ Sharma chuan rel leh rel station vawngfai turin theihtawp an chhuah mek tih a sawi a, mahse hemi kawngah hian a thawktu lam chauh ni loin passenger-te pawhin ṭan an lak ve a ngai a ni, a ti. 

Railways Act, 1989 hnuaiah rel pindan leh rel station tibawlhhlawhtu chu Rs 500 thleng chawitir theih an ni. 

NFR hian faina beihpui thlak a kal­puina peng pakhat atan hian an zone chhung station 13-ah a fai dan enfiahna atan CCTV a dah a, hei hi Station Master, Com­mercial leh RPF Officers bakah Divisional Railway Manager-ten an endik ṭhin. Zone chhunga station hrang hrangah bawlhhlawh bawm pawh dahbelh a ni a, rel pindan tinah dah a ni bawk. 

CCTV hmanga station fai leh fai loh endik ṭhinte chu Guwahati, Kathihar, Rangiya, Dibrugarh, New Jalpaiguri leh Tinsukia station-te an ni. Station tinah hian khualzinte hnena faina kalpui tura ngenna te, bawlhhlawh paihte hremna pek theih an nih dante a khat tawkin puan reng ṭhin a ni.