In nuai khat sakna tur lungphum Assam CM-in a phum

Assam chief minister Sarbananda Sonowal chuan Thawhlehni khan Prandhan Mantri Awas Yojana (Grameen) hnuaia chenna in nuai khat sakna tur lungphum chu Gauhati-a Sarusajai Sports Complex-ah a phum. 

Chief minister hian Assam State Rural Livelihood Mission hnuaia Self Help Group(SHG) 1,000-te hnena loan pekna tur lehkha leh, Deen Dayal Upadhaya Grammen Kaushalya Yojana hnuaia ṭhalai 3,000-te hna pekna tur lehkha a semchhuak nghal bawk. 

CM chuan sorkar laipui flagship programme, PMAY-G hnuaiah in nuai hnih Panchayat and Rural Development department chuan sak a tum tih a sawi. He hamṭhatna dawngtute chuan concrete in an dawn bakah, social security pawh pek tel an ni dawn a ni, a ti. 

Sonowal chuan mi rethei leh dinhmun chhe zawkte chuan inthiarna tur toilet thianghlim leh chenna tur inte an nei lo a, mahse PMAY scheme leh scheme dangte hmangin heng mi retheite hi in leh toilet thianghlimte pek an ni thei dawn a ni, a ti. Heng scheme hmang hian society ṭha tak din chhohna tur lungphum phum a ni, tiin a sawi. 

Assam-a BJP kaihhruai BJP sorkarin langtlang taka thil a kalpui chhoh avangin, sorkar pawhin kumtin cheng vaibelchhe 70,000 hman tur a neih theih dawn thu Sonowal chuan a sawi. Hei hi prime minister Narendra Modi hmalakna chak tak vang a ni, a ti bawk. State mipuite chuan PM Modi hmasawnna tur agenda siamte chu ngaihven a, state hmasawnna tura theihtawp chhuah turin a sawm. 

Minister of state (i/c) for Panchayat and Rural Development Naba Kumar Doley pawhin thu sawiin, financial year 2019-20 atan in 1,94,338 sakna turah, state sorkar chuan in 1,22,304 sakna tur sanction a dawng tawh tih a sawi.