Bangladesh hnenah Agartala airport runway zauhna tur ram dil

Sorkar laipui chuan Bangladesh hnenah Agar­tala-a Maharaja Bir Bikram airport runway zauhna tur ram a dil. 

Hmarchhak biala airport lun ber zinga mi, Agartala airport awmna hi ram acre 509-a zau a ni a, Bangladesh ramri bula awm a ni. 

Airport Authority of India (AAI) Director Bipin Kant Seth chuan Tripura sorkar hnenah runway zauhna tura ram acre 52 dilna tur chungchang sorkar laipuia thlen tura an ngen thu a sawi. "Kan mamawh zat ram acre 52 hi kan neih belh theih chuan, runway hman mek hi thlawhtheihna lian chi tana hman theih turin kan zauh thei dawn a ni," a ti. 

Tripura chief minister Biplab Kumar Deb chuan hemi chungchang hi sorkar laipui hnenah an thlen tawh thu leh, Bangladesh sorkar hnenah pawh lehkha pek a nih tawh thu a sawi. CM chuan, "Agartala airport hi hmarchhak bial mipuite chauh ni lo, Bangladesh mite pawhin an hmang nasa hle a ni. Airbus leh thlawhtheihna lian chite hman theih an nih chuan ram pahnih mipuiten an chhawr ṭangkai dawn hle a ni," a ti. Bangladesh-in ram hi a pe thei dawn a nih chuan a siamna atan cheng vaibel­chhe 1,500 - 1,600 vel a ngaih tur thu a sawi bawk. 

Tripura Transport De­partment official chuan Bangladesh hnena ram an dil hi Bangladesh khaw­chhak lam, Barhmanbaria district-a Hirapur khuaa mi a nih thu a sawi. Kum 1942-a Bir Bikram Kishore Ma­nikya Bahadur (1923-1947) rorelna hnuaia an awm laia siam, Agartala airport hi Indopui II hunlai khan a pawimawh hle. US Army Air Forces-a 4th Combat Cargo Group (4th CCG) chuan Burma rama Curtiss C-46 Commando aircraft tirh chhuahna atana an hman ṭhin a ni. 

He airport hi nikum khan Maharaja Bir Bikram Airport tiin a hming hi thlak a ni a, AAI chuan cheng vaibelchhe 438 sengin international standard-a siam turin a thawk mek a ni. Tripura sorkar chuan terminal building, runway leh thil ṭul danga hman turin AAI hnenah hian ram acre 72-a zau a pe a ni. Tripura transport and tourism minister Pranajit Singha Roy chuan kumin kumtawp lam emaw, nakkum kumtir lamah emaw Agartala airport chu hmarchhak biala international airport pathumna ni turin peihfel hman a ni dawn tih a sawi.