Manipur-in Green Ambassador atan Kum kaw mi ruat

Manipur sorkar chuan Chief Minister Green Ma­nipur Mission brand am­bassador atan hmeichhe naupang kum kaw mi, Elangbam Valentina Devi chu Nilaini khan a ruat. 

Hmeichhe naupang Elangbam Valentina Devi hi Hiyanglam Makha Leikai khuaa Amutombi Divine Life English School-ah Class V zirlai a ni a, Class I a nih laia gulmohar thingkung pahnih a phun chu an khuaa luikam tihfainaah kihsak a ni. A thingkung phun pahnih kihsak a nih avanga lungchhe taka a ṭap lai video chu social  media lamah a darh nasa hle a, state sorkar hotute beng hial a thleng ta a ni. 

Chief minister N Biren Singh, forest and environment minister Th Shyamkumar Singh, civil society organisation leh NGO-te pawhin video an hmuh hnu hian an ngaihven zui nghal a ni. Pathianni khan state forest department chuan Devi ngen angin kawngpui sira phun tur thingṭiak 20 an pe a ni. An khuaa Youth club pawhin a pual hian an khua leh a chhehvelah thingṭiak 1,000 phun an tum bawk. 

Green Ambassador a nih chhung­in Devi hi sorkar sponsor plan­ta­tion programme hrang hrang­ah a tel ve dawn a, Manipur-a thing­kung phun uar tura hmalakna hrang hrang, advertisment leh campaign-ahte pawh a tel ang.