PM-in Assam hospital pahnih lungphum phum Kawngpui siamṭhatna tur 'Asom Mala' a hawng bawk

Prime minister Narenda Modi chuan Pathianni khan virtual mode hmangin Assam-a hospital thar pahnih sakna tur lungphum a phum a, state highway leh district kawngpui siamṭhatna tur, 'Asom Mala' programme a hawng nghal bawk. 

PM-in Sonitpur district-a Bhotpara Pathar, Dhekiajuli hmuna hun a hmangah hian chief minister Sarbananda Sonowal, union minister Rameswar Teli leh state finance minister Himanta Biswa Sarma bakah mi pawimawh dang eng emaw zat an tel. 

Narendra Modi-a'n hospital pahnih lungphum a phumte hi cheng vaibelchhe 565 senga sak tur Biswanath Medical College & Hospital leh cheng vabelchhe 557 senga sak tur Charaideo Medical College & Hospital-te an ni. Heng medical facility pahnih aṭang hian kumtinin MBBS doctor 200 an zir chhuak thei dawn a ni. 

Prime Minister hian Pathianni chawhma dar 11:45 khan Bhotpara Pathar hi a thleng a, hun a hman zawhah vantlang inkhawm buatsaihah thu sawiin, he hunah hian mi nuai li chuang an tel nia sawi a ni. Modi chuan hmarchhak bialin kawng hrang hrangin hma a sawn chhoh zel thu sawiin, hemi kawngah hian Assam chuan chanvo pawimawh tak a chelh a ni, a ti.

Congress sorkar lai khan Assam-ah chuan kum 2016 thleng khan medical college paruk chauh a la awm thu sawiin, BJP in thuneihna a chan hnuah kum nga kalta chhung khan medical college thar paruk din belh a ni tawh a ni, tiin PM Modi chuan a sawi. Hospital pahnih din thar tur chuan state mipui, a bikin upper Assam lam miten an chhawr ṭangkai hle dawn a ni, a ti. State chhunga MBBS seat 725 chauh awm ṭhin chu heng college-te hi hman an nih hunah chuan kumtinin doctor thar 1,600 an chhuak thei ziah tawh dawn a ni, a ti. PM chuan state chhunga medical college pakhat-ah MBBS course chu Assamese medium-a zir theih tura buatsaih a nih tur thu a sawi bawk. 

State highway leh district kawngpui thuam ṭhatna atana 'Asom Mala' scheme hnuaiah cheng vaibelchhe 8,000 dah anih thu PM chuan sawiin, he scheme hmang hian state chhunga road infrastructure system chuan nasa taka hma a sawn tur thu a sawi. He scheme hmang hian Dhekiajuli leh Borsala constituency-ah kawng thar siam a ni dawn tih PM chuan a sawi bawk a ni. 

Kawngpui ṭha chu Assam hmasawnna atana thil pawimawh tak a ni tiin, PM chuan Bharat Mala project zulzuiin Asom Mala chu siam a nih thu a sawi. BJP sorkar hnuah state chhungah kawngpui thui tak leh lei eng emaw zat siam a ni tawh tih sawiin, Assam mipuite duhthusam tipuitling tura theihtawp an chhuah zel tur thu a sawi. 

Chief minister Sarbananda Sonowal chuan PM Modi chungah Assam mipuite aiawhin lawmthu a sawi a, PM-in a thawhpuina ṭha tak avangin Assam sorkar chuan a thutiam hrang hrangte a tipuitling thei tih a sawi. India ram Prime Minister ni tawh zingah Narendra Modi chu Assam ngaih pawimawh ber a ni, a ti.