Tripura : Minister-ten Thingṭiak phunna tur sum sanction

Tripura council of minister chuan Roadside Beautification of Plantation of Trees (RBPT) scheme hnuaia an state-a kawngpui km 13,120-a thui sir tawn tawna thingṭiak phunna turin cheng vaibelchhe nga an sanction. Thingṭiak phunna tur zingah hian national highway km 853-a thui pawh a tel a ni. 

Thingṭiak phunna programme hi Agartala-a Badharghat leh state chhim tawp lamah kalpui hmasak a ni ang a, a tahtawlin hmun dangah kalpui chhun­zawm a ni ang. Fur reh hmain thingṭiak phun runpui hi zawh hman tum a ni bawk. 

Education minister leh cabinet thu­puangtu Ratan Lal Nath chuan he project kalpuina turah hian forest department chu nodal department atan ruat a nih thu a sawi a, department dangte pawh programme tihhlawhtlin a nih theihnan thawhpuiah an sawm nghal bawk. A ṭul anga hma la turin Chief Secretary kaihhruaina hnuaiah state-level committee pawh din a ni. 

Ratan Lal Nath chuan budget-ah khan state sorkar chuan mahni in bul kawngpui sira thingkung phunte enkawltute hnenah thla tinin puihna, Rs 200 pek ṭhin a nih tur thu a lo puang tawh tih sawiin, budget pass a nih 

aṭanga thla li hnuah sorkar chuan thingṭiak phun uar pawimawhzia hi a taka lantir zel a tum a ni, a ti.