M'laya-i'n Assembly building sak mekah puihna dil

Meghalaya sorkar chuan sorkar laipui hnenah Maw­diangdiang-a Meghalaya Ass­embly building sak mek zawh fel a nih theihna tura ṭanpuina pe turin a ngen. 

Assembly speaker Methbah Lyngdoh leh chief minister Conrad Sangma-te chuan New Delhi-ah Lok Sabha speaker Om Birla hmuin, assembly building sak meka sum lama harsatna an tawh dante an sawipui a ni. 

Meghalaya Assembly build­ing thar tur hi kum 2019 June thla aṭang khan sak ṭan a ni a, Mawdiangdiang-a ram acre 80-a zauah sak a ni. Building sakna atan hian cheng vaibelchhe 127 ruahman a ni a, Uttar Pradesh-a Rajkiya Nirman Nigam Ltd in a sak hna hi a thawk. Chief Minister chuan kumin March thlaah sak zawh hman a duh thu a sawi. 

Chief Minister chuan Lok Sabha Speaker hi an state tlawh turin a sawm bawk. Sangma hian union housing and urban affairs minister Hardeep Singh Puri pawh hmu­in, New Shillong Township tihchantlunna tur leh, kawng leh infrastructure dang siamnaah pui turin a ngen bawk a, hei bakah hian Williamnagar Water Supply Scheme kalpuinaah pui turin union ministry hi a sawm bawk a ni. 

Union Jal Shakti minister Gajendra Singh Sekhawat  nena an inkawmnaah, CM chuan Meghalaya-a Jal Jeevan Mission project kalpui dan leh hmasawn dante a hrilh. State sorkarin Wah Umkhrah leh Umshyrpi lui cheiṭhat a tumnaa pui turin a sawm bawk.

Union youth affairs and sports minister Kiren Rijiju bulah state chhunga sport infrastructure hrang hrang sak mek chungchangte a sawipui a, Meghalaya state nih champha vawi 50-na puala Shillong-a North East Youth Festival 2022 siam an tum thu leh, a theih anga thawhpui turin a sawm a ni.