ILP permit pek aṭangin Rs vbc 2.5 lalut tawh : Manipur CM

Manipur chief mi­nister N Biren Singh chuan nikum chhung khan Inner Line Permit (ILP) pek chhuahna aṭangin state sorkar chuan cheng vaibelchhe 2.5 a lalut tih a sawi. 

Legislative Assembly session neih mekah zawhna a chhannaah CM chuan nikum January 1- December 31 chhunga ILP pekna aṭanga sum hmuh chu Rs 2,52,78,000 a nih thu a sawi a, heng zinga Rs 7,75,400 chu permit renew-na aṭanga lut a ni tih a sawi a ni. 

Manipur-a ILP system hman hi sorkar laipuiin a remtihsak hnuah December 11,2019 khan President Ram Nath Kovind chuan order hi a tichhuak a, January 1, 2020 aṭang khan hman ṭan a ni. Hmarchhak state zingah Manipur hi ILP system hman phalsak palina a ni a, a hma in Arunachal Pradesh, Nagaland leh Mizoram-ahte hman a lo ni tawh bawk. CM Singh chuan a kaihhruai sorkar chuan state leilung fate venhim leh humhalhna turin theihtawp a chhuah zel dawn tih a sawi. 

Singh chuan nikum chhung khan ILP hi regular permit 20,531 leh temporary permit 1,40,257 pek chhuah a ni tih a sawi a, special category permit erawh pek chhuah a awm lo.