Lungalhthei khura ruang la lachhuak lo
Indian Navy-te chuan kar liamta Nilaini khan Meghalaya lungalhthei khura tang15 zinga ruang pakhat chu hmu tawh mah se, nimin thleng khan ruang hi lakchhuah theih a la nih loh thu an sawi.
Chhanchhuah hna thawktute thuchhuah siamtu R Susngi chan Inrinni tlai khan ruang lachhuak tura hmalakna hi chawlhsan hrih a nih thu a sawi. Ruang hi Remotely-operated vehicle (ROV) hmanga lakchhuah tum niin ROV in a hnuhchhuah dawn hian ruang hi a darh belh zel avangin ruang lakchhuah tumna hna hi an chawlhsan hrih tih sawiin sorkar thupek an nghak tih a sawi bawk.
Inrinni khan khur chhunga tang 15 zinga chhungkaw ṭhenkhat chu koh tawh niin video footage aṭangin tunge a nih an hriat theih leh theih loh an zawt hlawm a, mahse report hnuhnung ber thleng chuan tunge a nih hriat theih a la ni lo.
Susngi chuan Coal India Limited (CIL)-te chuan tui pump chhuah hna hi an thawk mek zel tih sawiin Inrinni tlai dar 5 thleng khan, darkar 46 chhungin tui litre 5216400 vel an pump chhuak tawh tih a sawi.
KSB pawhin Inrinni tlai aṭanga Pathianni tlai dar 5 thleng khan tui litre 4554000 vel an pump chhuak tawh bawk nia sawiin NDRF leh Odisha Fire Service-te pawhin an theihtawp an chhuah ve bawk a ni.
Indian Navy tui lutthiamte hian kar liamta Nilaini khan khur chhung ft. 160 vela thukah ROV hmangin ruang hi an hmu a, ruang dang erawh an la hmuh belh lo thung a ni.