NTC-in Nagaland ṭhendarh duh lo

Nagaland Tribes Council (NTC) chuan Nagaland state ṭhendarh a, Frontier Nagaland din an duh lo tih an sawi. 

Eastern Nagaland People's Organisation (ENPO) chuan kum eng emaw chen chu Naga­land state khawchhak lam chu state hran, Frontier Nagaland-a siam an phut a ni. 

NTC thupuangtu Theja Therieh chuan, ENPO chuan state hrang din chu hun rei tak lo phut tawh mah se, council chuan an state ṭhendarh tumna reng reng chu a thlawp dawn lo.

Hnam 16-te awmkhawmna state hi ṭhendarh kan remti ngai lo ang. Hemirual hian ENPO chuan an thil duhzawng lantirna turin dikna erawh an nei a ni. State ṭhendarh zawng ni lo a, ENPO thil phut tihhlawhtlinna tur leh, an dinhmun chawikanna tura sorkar laipuiin hma a lakna erawh chu kan dodal lo ang, tiin a sawi. 

ENPO hi Konyak, Chang, Sangtam, Khiamniungan, Yim­chunger leh Phome hnam intelkhawm zinga pawl lian ber a ni. Easter Nagaland state hran an ngiat hian district pali- Tuensang, Mon, Longleng leh Kiphire-te a huam a ni. ENPO palaite hi state hran din an ngiat chungchangah sorkar laipui hotute be turin New Delhi-ah an awm mek a ni. 

Kum 2015 aṭang khan ENPO hian state hran hi an ngiat tawh a, state hran din an phutna district palite chu kum tam tak ngaihthah an ni tawh tih an sawi. Hei vang hian state hran an neih chauhin rorelna 

ṭha leh hmasawnna an nei ve thei dawn niin an ngai.